Mashtronte të "dashurat" dhe u kërkonte para për mos postimin e fotove intime në Facebook

Hetues policorë nga Drejtoria Rajonale e Prizrenit kanë arrestuar Lulzim Dinën nga një fshat i Rahovecit në cilësi të personit të dyshuar, sepse i njëjti ka konsumuar elemente të veprave penale të shantazhit, mashtrimit dhe fotografimit të paautorizuar.
Sipas hetimeve të para, pas ankesës së një viktime femër, janë gjetur prova e fakte se i dyshuari pasi i ka përvetësuar viktimat me premtime të rreme për martesë, më vonë ndaj tyre ka ushtruar shantazh duke u kërkuar goxha para për fshirjen e fotove komprometuese të cilat i postonte në "Facebook” në emër të një personi të imagjinuar të gjinisë femërore. Po ashtu, i dyshuari për vete përdorte një emër të rremë gjatë paraqitjes me viktima. Pas mbledhjes së provave dhe intervistës me të dyshuarin në prani të avokatit mbrojtës, prokurori i shtetit ka nënshkruar vendimin për ndaljen e të dyshuarit nën masën e arrestit me burg të cilën e ka vërtetuar gjyqtari i procedurës paraprake, duke ia vazhduar paraburgimin në afat prej 30 ditëve.
Sipas raporteve policore, i dyshuari Dina është recidivist i veprave të tilla penale