Të shtënat me armë zjarri e kanë tmerruar një 27-vjeçar nga fshati Vitomiricë, të martën, rreth mesdite gjersa po pinte kafe në një lokal. Megjithatë ka shpëtuar mirë pasi duket se qëllimi i sulmuesit nuk kishte qenë ta vriste atë. Jo vetëm viktima, por edhe banorët përreth janë tmerruar kur në qendër të Pejës, kanë parë një të ri me kallashnikov në dorë, i cili pas të shtënave e ka sulmuar edhe fizikisht viktimën, derisa kalimtarët kanë reaguar dhe ia kanë nxjerrë armën nga duart, duke e futur pastaj në veturën e tij ku i kishte shkrepur një plumb, por pa të lënduar. Ngjarja ka ndodhur në tarracën e një lokali afër Shtëpisë së Kulturës. "Rreth orës 13 policia është njoftuar se në rrugën "Enver Hadri” ka të shtëna. Nga hetimet e para dyshohet se viktima është sulmuar në kafiteri kur papritmas nga vetura del i dyshuari, rreth 22 vjeçar, nga Peja me armë automatike në dorë AK-47, duke shtënë në drejtim të viktimës. Pasi viktima u kishte shpëtuar të shtënave, i dyshimti ishte afruar dhe kishte goditur viktimën me shqelma dhe pas ndërhyrjes së disa qytetarëve ishte larguar në drejtim të panjohur”, ka thënë zëdhënësi i policisë së Pejës, Xhevat Ibra. Nuk ka kaluar shumë kohë dhe Policia e ka gjetur dhe të dyshuarin, të cilit i është konfiskuar arma. I dyshuari po mbahet në Polici dhe po hetohet për "vrasje në tentativë” si dhe "shkaktim i rrezikut të përgjithshëm, gjuajtje me armë”.